उखु किसानका पीडा: खेती गर्न मलकाे अभाव, उत्पादन बिक्री उधारोमै

 

जनकपुरधाम । सर्लाहीको धनकौल गाउँपालिका, हटकटवा गाउँका ६० वर्षीय किसान रामदेव कुशवाहा उखु खेती गर्दै आएका छन् । खेतीको समयमा आवश्यक मलखाद नपाउँदा र उत्पादन बेचिसकेपछि पनि समयमा भुक्तानी नपाउँदा उनी निराश छन् ।

उखु राेप्ने बेलामा पनि मलको अभाव थियो, अहिले गोडमेल गर्ने समयमा पनि मल पाउन नसकेको उनले गुनासो पोखे ।

रामदेवजस्तै सर्लाहीका अधिकांश उखु किसान यतिबेला मल अभाव र चिनी उद्योगबाट समयमै भुक्तानी नपाउने समस्याले पीडित छन् । खेतीको लागत बढ्दै गएको छ, तर किसानले आवश्यक सेवा–सुविधा त परै जावस्, बेचेको उखुको मूल्यसमेत समयमै पाउन सकेका छैनन् । यसले उनीहरूको चिन्ता थप बढाएको छ ।

नेपालमा सबैभन्दा बढी उखु खेती हुने जिल्लामध्ये सर्लाही प्रमुख मानिन्छ । जिल्लाका धनकौल गाउँपालिका, बसबरिया गाउँपालिका, रामनगर गाउँपालिका, गोडैता नगरपालिका, बलरा नगरपालिका लगायतका क्षेत्रमा करिब ९५ प्रतिशत किसानले उखु खेती गर्दै आएका छन् । उखु खेतीसँग जोडिएका समस्या भने वर्षौंदेखि जस्ताको तस्तै छन् ।

उखु किसानले लामो समयदेखि मल अभाव, सिँचाइ समस्या, उचित मूल्य नपाउने अवस्था र उद्योगबाट ढिलो भुक्तानीको समस्या झेलिरहेका छन् । चुनावका बेला नेताहरूले किसानका समस्या समाधान गर्ने प्रतिबद्धता जनाउने गरे पनि व्यवहारमा त्यस्तो परिवर्तन नदेखिएको किसानहरूको गुनासो छ ।

x